KONTRIBUSION DE LOS DJUDIOS DE ESPANYAA LA LENGUA ESPANYOLA I SU KREASION
LITERARIA

AKY YERUSHALAYIM
AÑO 40, N° 101
Septiembre 2019

Mario Eduardo Cohen
Presidente CIDICSEF

El kastiliano o espanyol es avlado oy por 572 milyones de personas i se estima ke pueden alkansar a los 754 milyones verso la metad de este siglo (segun el Instituto Cervantes). En Israel se estima ke kaje un milyon de personas lo entienden (siendo oy la kuatrena o sinkena lengua).

Nos preguntamos: Ke tiene ke ver la istoria de los djudios kon la formasion de esta importante lengua? Para entrar en tema devemos azer un poko de istoria. El embrion del espanyol kale bushkarlo en el latin vulgar avlado en la zona sentral del norte de Espania en la epoka romana. Despues de la kayida del Imperio Romano, en el siglo V, el uzo del latin kulto por la djente
komun fue menguando gradualmente. El dialekto kastiliano ke tiene sus orijines en el kondado medieval de Castilla (oriente de Cantabria i norte de Burgos), kon influensias del latin ansi ke baskas i arabas, se espandio al sud de la peninsula grasias a la Rekonkista. Verso el siglo X ya empesam a apareser tekstos ke se van diferensiando del latin vulgar.

Un salto djigante en la formasion de la mueva lengua lo konstituyo el reynado de Alfonso X yamado el Savio (Rey de Castilla y Leon), ke elevo el prestijio del uzo del kastiliano eskrito adientro de su korte i por todo el territorio kastiliano en ekspansion.

Un rolo sentral tuvo la kreasion del Kolejio de Traduktores de Toledo kon la kolaborasion de varios djudios y konversos.Ken fueron los ke apoyaron mas la ovra del rey savio? Fueron djustamente los miembros djudios del Kolejio de Traduktores. Ellos uzaron para sus traduksiones el romanse (kastiliano en formasion) siendo ke el latin era la
lengua de la Iglezia.

Esta kontribusion la rekonosio klaramente el eskritor meksikano Carlos Fuentes, en la inaugurasion del III Kongreso Internasional de la Lengua Espanyola: “Somos lo que somos y hablamos lo que hablamos, porque los sabios judíos de la Corte de Alfonso el Sabio impusieron el castellano, lengua del pueblo, en vez del latin, lengua de la clerecía, a la redacción de la historia y las leyes de Castilla”.

De esta manera, el kastiliano fue la primera lengua europea, ademas del latin, uzada para tekstos sekulares de filozofia, istoria i derecho. Adjusta Angel Alcalá (en su ovra Los judeoconversos en la cultura y sociedad española, 2011): “Resulta conmovedor enterarse de que alguno de los primeros balbuceos de la lengua castellana tiene sabor semita: no
andaría errado en demasía quien propusiera la paradoja que el castellano fue en buena parte bautizado con aguas judías. “(pag. 58)

En su ovra Espanya en su historia Americo Castro senyala ke “lo unico que ahora interesa es dejar bien en claro que el castellano comenzó a servir de instrumento de alta cultura gracias a los judíos que rodeaban a Alfonso X y fomentaron sus curiosidades afinadisimas; dos siglos mas tarde, la situación sigue siendo la misma, pues son los judíos y no los cristianos quienes usan la lengua vulgar para el comentario de las Escrituras, la prosa filosofica y los estudios
astronomicos”.

Algunos konsideraron a Yehuda Halevi komo el primer autor de versos en romanse (el espanyol de entonses), tema ke oy esta en diskusion. Ma korrespondio a Sem Tob, un djudio de Carrión de las Condes (Palencia) eskrivir el primer livro de poezia lirika en espanyol durante el siglo XIV. Se trata de los yamados Proverbios Morales (anyo 1365). Un exemplo del mismo: Cuando se seca la rosa que ya su sazón sale, Queda el agua olorosa, rosada, que mas vale.Despues de Sem Tob le sigieron munchos otros en i afuera de Espanya.

Un exemplo de esta ekspansion de djudios en poezia en lengua espanyola, la da tres siglos despues Daniel Levy de Barrios (siglo XVII), kuando en Amsterdam eskrivio sovre su sivdad natal, Montilla: Verde estrella del cielo Cordobes, agrado de Marte, Corte de los famosos descendientes del Alonso del sol cumbre. Este es solo uno de los tantos poetas i eskritores sefaradis ke sigieron eskriviendo en espanyol, afuera de Espanya. Un kavzo espesial dinyo de mensionarse es el de los eskritores djudios de Amsterdam, ke kompetian kon los peninsulares durante el Siglo de Oro.

Kreasion literaria de la diaspora oksidental sefaradí

Se konsidera diaspora oksidental sefaradi a los djudios ke se aresentaron en el Siglo XVII en lugares onde no avia de antes komunidades djudias: Amsterdam, Londra, Hamburgo ansi ke las kolonias de Amerika. Tambien se puede konsiderar komo parte de este grupo a los djudios ke emigraron, en la misma epoka, a Livorno, en Italia.

Los djudios sefaradis provenientes de Portugal i Espanya se aresentaron espesialmente en los Paizes Bashos, governados por los protestantes i konsekuentemente sin la Inkizision katolika. Aki produsieron una ekstraordinaria literatura en kastiliano o en portugues, tanto de tematika relijioza komo profana (desde sermones asta ovras de teatro, poezia sakra o profana, proza didaktika o narrativa, etc.). Esta literatura se difundio sovre todo en livros imprimidos en karakteres latinos, publikados en Italia o los Paizes Bashos, i en los aspektos linguistikos i estilistikos tiene poka diferensia de la ke en estas mizmas datas se
kreava en la Peninsula Iberika. Senyala la investigadora Maria del Carmen Artigas ke en Amsterdam se publikaron ovras literarias de todo djenero: istorikas, poetikas i apolojetikas, ademas de livros relijiozos, kalendarios kon las fiestas relijiozas, asi komo ovras de Lope de Vega, Calderón i Gongora.

Estos sefaradis mantuvieron la lengua kastiliana i imitaron a los poetas de la Peninsula, aun ke algunos eskrivieron en ebreo. Jacob Israel Belmonte organizo dos akademias literarias. El poeta mas konosido de la epoka, Daniel Levy de Barrios, desho testimonio de estas organizasiones kulturales. Entre otros poetas establesidos en la sivdad de Amsterdam se topavan David Cohen de Lara, Miguel de Silveira, Uriel da Costa, las poetesas Isabel de Correa, Bienvenida Cohen Belmonte i Isabel Enriquez. Las reprezentasiones teatrales abondavan i el kritiko Henry Besso pensake el “teatro djudio” nasio en Holanda.Ademas de las konosidas ovras de Menasseh ben Israel (el ke logro la readmision de los djudios a Inglitiera), kale senyalar a Imanuel Aboab, Yshak Cardoso (autor de Excelencias de los Hebreos), Abraham Israel Pereyra y el konosido pensador Baruh Spinoza.Lo mas importante para senyalar es ke kaje todos los aki sitados provenian de famiyas djudias de la Peninsula Iberika ke duvieron konvertirse al kristianismo.

En el lenguaje de la epoka eran desendientes de “kristianos muevos” ke, al aresentarsen en el siglo XVII en Amsterdam (i otras sivdades de la diaspora oksidental) retornaron kon fuersa al judaizmo, es dezir ke se tratava de “djudios muevos”.Literatura konversa en el siglo de oro Otro de los kapitolos interesantes se refiere a la kontribusion de los djudios ya konvertidos al katolisizmo a la literatura espanyola. Senyala Americo Castro ke se uza atribuir las ovras satirikas del siglo XV a konversos, komo Juan de Mena, Hernando del Pulgar, Rodrigo de Cota i Antón de Montoro, senyalando la posibilidad de autores konversos para El Lazarillo de Tormesy La Celestina. En las ultimas dekadas fue deskuvierta la orijin djudia o konversa de diezenas de ombres yave de la literatura espanyola de los siglos XVI y XVII. Estas investigasiones se konfrontan kon las ke fueron echas asta el siglo XIX, kuando el deskuvrir antepasados djudios konstituiya una verguensa para las famiyas sospechadas.

Oy, por kuriozidad sientifika (i a vezes por sierto sentimiento de kulpa) se estan investigando las orijines de munchos nombres de primera linya komo konversos o desendientes de tales.

Eskrive Juan Goytisolo (El Pais, 1999): “El pesimismo radical de Fernando de Rojas y Mateo Aleman, la ironía de Cervantes, la amarga imprecación de Fray Luis de León son manifestaciones distintas de una estrategía personal de desengaño, resistencia o huida y coincide con la idea de que a los conversos se le debe el movimiento central del siglo de oro de la literatura española”.

Ademas, los sefaradis yevaron las lenguas iberikas a todos los kontinentes konosidos en akeya epoka. Verso la fin del siglo XVI, se avlava espanyol, grasias a los kastilianos en la Peninsula Iberika, Filipinas i Amerika i en otros paizes grasias a los djudios sefaradis. En sinteza, grasias a las ultimas investigasiones oy podemos senyalar ke los djudios tenemos muncho ke ver kon el nasimiento i la konsolidasion de una de las lenguas mas avladas en la aktualidad


Presidente del Centro de Investigación y Difusión de la Cultura Sefardí

Mario Eduardo Cohen

____________________________________________________

PESAH EN LA AMERIKA KOLONIAL

PÁGINA 7 AL 9
AKI YERUSHALAYIM
AÑO 33 ABRIL 2012 N° 91

Mario Eduardo Cohen
Presidente CIDICSEF

"...Cuando los hijos de Israel salieron del cautiverio en Egipto y pasaron el mar por los siete caminos que Dios les abrió, habiendo llegado a la tresera parte del mar cansados y hambrientos, hicieron de harina que llevaban pan sin levadura ni sal, y lo comieron juntamente con mucho perejil y muchas hierbas, y en ceremonia de esto los observantes, tres días antes de la Pascua de resurrección que celebran los cristianos, habían de comer pan sin levadura ni sal por Pascua de la dicha ley de Moisés.” Kon estas palavras – notadas por
la Inkizision de Mexico - la kriptodjudía Blanca Enriquez (ke no podia tener kalendario djudio para fiksar las festividades) konta a su ija sovre la tradisional fiesta djudia de Pesah. I adjusta ke, para ke la servidumbre no se de kuenta de los aparejos ke eran echos para selebrar esta fiesta, se aprontava de antes “manteles nuevos y una cazuela nueva y un brasero nuevo y un cuchillo nuevo y una tinaja de agua nueva”.

Este relato forma parte de la gran memoria djudia, de la kuala mos avla la istoriadora Anita Novinsky. Sigun su vizion, ay diferensia entre los konseptos de istoria i memoria. “La istoria – apunta eya - es una konstruksion, siempre problematika, de akeyo ke no es mas ke una reprezentasion del pasado, una operasion intelektual ke depende de una analiza i un deskorso kritiko. La istoria solamente konose lo relativo, apartiene a todos y a ninguno.” “La memoria es diferente, es vida, kargada por djente biva, un fenomeno siempre real, un lugar bivo, un eterno prezente. La memoria es efektiva, majika i se alimenta de simbolizmos, la memoria es absoluta.”

A traves de la memoria, los mitos, la istoria djudia, fueron transmitidos de jenerasion a jenerasion, dando sinyifikasion a la sufriensa (de los kriptodjudios) i kreando una identidad de grupo” (1)

Esto akontesio un siglo i medio despues de la ekspulsion i la proibision del djudaizmo en la Peninsula Iberika i Amerika.

Durante mas de dos siglos, la existensia djudia en la Amerika ispanoportugeza sufrio las limitasiones devidas a la prezensia de los terribles tribunales inkizitoriales - en Lima, Cartagena de Indias i Mexico. Durante todo el periodo kolonial se defendio a los djudios de bivir en las kolonias ispano-portugezas de Amerika, i eyos duvieron bivir komo djudios eskondidos. La situasion fue muy diferente en las kolonias anglosaksonas, danezas o - en okaziones - en las fransezas del Muevo Mundo, onde los djudios fueron admitidos, salvo algunas eksepsiones (2).

Kostumbres djudias basho el miedo

Durante el dia, el individuo devia segir las kostumbres sosiales kristianas para no despertar sospechas. Son munchos los testimonios a este sujeto. Ma, durante la noche i en la intimidad de su kaza, el kriptodjudio pratikava sus kostumbres tradisionales, lo ke kreava serios problemas de identidad. A esto kale adjustar ke, en jeneral, eyos resivian la informasion sovre sus djudaizmo kuando ya eran adolesentes o adultos, i esto kavzava ke munchas vivensias de sus chikez no se korrespondian kon las del adulto. Jeneralmente estas kostumbres se transmitian komo una erensia del padre al ijo varon. Uno de los rezultados de esto era ke, entre personas ke bivian endjuntos podia aver algunos ke no pratikavan kostumbres djudias, kavzando mas problemas de identidad al kriptojudio. En el kavzo de Mexico, de otra parte, uvo notables exemplos de mujeres “guardianas de la tradision”, komo las yamo la istoriadora Yolanda Moreno Koch (3).

En verdad, no existen munchas referensias a la praktika del Pesah en Amerika, seguramente porke para la selebrasion de la festividad avia menester de varios atuendos i produktos de alimentasion diferentes de lo ke uzava komer en akeya epoka, lo ke deshava a los kriptodjudios ekspozados durante una semana al peligro de ser malsinados a la Inkisision ke bushkava a los ke “selebran la Paskua del pan sensenyo empesando a komer lechuga,s apios i otras verduras en tales dias”. Lo ke atira la atension de manera espesiala es la grande importansia ke los kriptodjudios davan a la festividad de Purim i, sovre todo, al Ayuno de Ester ke viene antes de esta fiesta.

La vitalidad de los kriptodjudios amerikanos

La istoriadora Lusia Garcia de Proodian (ke en jeneral manifesta muy poka simpatia al djudaizmo) aze sovresalir “la imensa vitalidad de este puevlo”, referandose al seadiziente prozelitismo ke se notava entre los kriptodjudios, afirmando ke: “Mos sentimos sorprendidos i asta admirados de la imensa vitalidad de este puevlo ke, en un medio tan adverso i poko propisio a sus butos, no se resinyava a tener una aktitud pasiva, sino ke, a la kontra, se lansava a tomar la ofensiva, tratando de enlistar muevos adeptos. Sin duda, su afan prozelitista konstituiya un poderozo korriente subterraneo ke iva karkomeando los fondamentos de la heterojenea i efervesente sosiedad kolonial” (4)

Otro istoriador aktual afirma sovre los kriptodjudios amerikanos: “son djudios... solamente porke se sienten parte de una kadena milenaria, porke azen parte de un linyaje; disminuidos kulturalmente por un prezente en el kual se konsienten en apreto, eyos mantienen sus diferensias, boltando la mirada verso el pasado. (5)”

Komo lo apunti, al prinsipio del artikolo, dona Blanca Enriquez admetio delantre la Inkizision su fidelidad a las kostumbres de Pesah, dando ekspresion a la yamada memoria judia.

Malgrado las muy difisiles sirkonstansias ke los djudeokonversos traversaron en diferentes epokas, uvo martires kriptodjudios ke ofresieron sus vidas para mantener ensendida la flama de la libertad de konsensia, de la dinyidad humana i de la realizasion de los mas altos valores Los ke ya en akeya epoka supieron mantener, konsolidar i vigorizar sus identidad malgrado todas las persekusiones, izieron tambien los primeros pasos en el largo kamino ke yevo mas tadre a la emansipasion amerikana i, a traves de eya, a la yena libertad, la konvivensia pasifika i el pluralizmo demokratiko.

_ 1) Anita Novinsky. “Cristianos Nuevos en Brasil. Historia y Memoria” en SefárdicaNº 10, CIDICSEF, Buenos Aires, septiembre 1993, pág. 67

2) Mario Eduardo Cohen. “Costumbres diferenciales de los descendientes de los judíos hispanoportugueses del Caribe: el caso paradigmático de la oración. ‘Bendigamos al Altísimo”, en Proceeding o the Thirtenth British Conference on Judeo-Spanish Studies, Queen Mary, University of London, 2006, pags. 7 a 14

3) Yolanda Moreno Koch. “Judeoconversos en México y otros lugares: las mujeres guardianes de la tradiciónen América y los judíos hispanoportugueses”. Coordinador Fernando Díaz Esteban. Real Academia de la Historia, Madrid, 2009, págs. 81 a 102. Véase también: Seymour B. Liebman. Valerosas Criptojudías en América Colonial, Congreso Judío Latinoamericano, Buenos Aires, 1973.

4) Lucía García de Proodian. “Los judíos en América. Sus actividades en los Virreinatos de Nueva Castilla y Nueva Granada. S. XVII”. Consejo Superior de Investigaciones Científicas, Instituto Arias Montano, Madrid, 1966, pág. 7

5) Ricardo Escobar Quevedo. Inquisición y Judaizantes en América Española (siglos XVI –XVII).Editorial Universidad del Rosario, Bogotá

Presidente del Centro de Investigación y Difusión de la Cultura Sefardí
Mario Eduardo Cohen

____________________________________________________

A “DEVDA” DE JORGE LUIS BORGES AL PUEVLO DJUDIO

AKI YERUSHALAYIM
AÑO 34, N° 93, Abril 2013
Página 26 a 29

Mario Eduardo Cohen
Presidente CIDICSEF

El Kongreso de Argentina viene de fiksar el día 24 de Agosto de kada anyo komo “Dia del Lektor”, en konmemorasion i omaje al aniversario de nasimiento del eskritor Jorge Luis Borges.
Jorge Luis Borges es el eskritor latinoamerikano ke yevo, mas ke ningun otro, muchos aspektos de la kultura djudia i Israel a la intelektualidad de avla espanyola (la Kabala, el Golem, Cancinos Assens, Spinoza, Heine, innumerables personajes djudios en sus kuentos, entre otros).Ansi dizia el, kon ironia, tokando a su interesante i eterna relasion kon el djudaizmo:

“He hecho lo mejor que pude para ser judío. Pude haber fracasado... Si
pertenecemos a la civilización occidental, entonces todos nosotros, a
pesar de las muchas aventuras de la sangre, somos griegos y judíos...
Muchas veces me pienso judío pero me pregunto si tengo derecho de
hacerlo.*”

Komo i por ke se interesa Borges en el djudaizmo? Seguramente, empeso kon su kuriozidad por kulturas diferentes i su fasinasion pujo ainda mas al deskuvrir los manansiales del djudaizmo. Resivio las primeras nosiones de
este tema de la mano de su avuela ingleza, ke savia de memoria gran parte de la Biblia; despues renforso su bagaje a traves de su amistad, en Suisa, kon dos intelektuales djudios i mas tadre, en su estadia en Espanya, kuando konosio a Cansinos. Kon los anyos, dezvelopo esta relasion kon otros miembros de la komunidad djudia. Ken era Cansinos-Assens? Era una persona ke avia topado su djudaizmo bushkandolo el mizmo. Borges lo konsiderava su maestro i se refera a el en un prologo i en un poema ke yeva su nombre. En el primero senyala:

“
Cansinos era sevillano de tradición catolica... Profesó el judaismo y se
casó con una judía, para engendrar en ella un hijo judío. Los judíos lo son
por andanzas preteritas de su sangre y por heredado acto de fé; Cansinos
eligió su destino”.
I despues, en un fragmento del sitado poema ekspresa el kamino de esta
eksplorasion ke izo su maestro:
“

Bebió como bebe un hondo vino
Los Salmos y el Cantar de la Escritura
I sintió que era suya esa dulzura
I sintió que era suyo aquel destino.”

Komo senyalo la investigadora Edna Aizenberg, “Borges (fue) un argentino no djudio ke uzo la puerta sefardita para entrar en la kultura djudia”. Es posible ke Cansinos influensio a Borges para ke se inklinara a la parte sefaradi de la kultura djudia. Su pasion yego a tal punto ke formo parte de un sentro de Estudios Sefardies, aya por 1965. Borges yego asta dezir, segun lo apunto Bernardo Ezekiel Koremblit, ke:

“
una de mis felicidades consiste en pensar que podría pertenecer al pueblo de Moises ben Maimón, de Iehuda Haleví y de las Sefirot”.
El sigiente fragmento del poema “Una llave en Salonico” es elokuente en esta pasion por lo sefaradi:

“Abarbanel, Farias o Pinedo,
Arrojados de España por impía
Persecución, conservan todavía
La llave de una casa de Toledo.
“Libres ahora de esperanza y miedo,
Miran la llave al declinar el día
En el bronce hay ayeres,lejanía,
Cansado brillo y sufrimiento quedo


Las referensias al puevlo djudio son munchisimas en la ovra borgeana. Se interesava i se maraviyava frente a las diferentes maneras del puevlo djudio de agruparse komo tal, desde los getos, sigun dizia en un reportaje,
“Durante siglos, en toda Europa, el pueblo elegido fue confinado en barrios que tenian algo o mucho de leprosarios y que, paradojicamente, fueron invernaculos magicos de la cultura djudia”, i asta las djuderias, tal komo lo deskrive en su inmortal poema El Golem

“
Los artificios i el candor del hombre
no tienen fin. Sabemos que hubo un dia
en que el pueblo de Dios buscaba el Nombre
en las vigilias de la juderia .
I referiendose a su amado Baruj Spinoza, dize en un poema dedikado al filozofo:

“Alguien construye a Dios en la penumbra
“Un hombre engendra a Dios. Es un judio
Borges i Israel
El gran eskritor sentia un profundo amor por Yerushalayim i Israel, i se mostrava, tanto en sus eskritos komo en sus alokusiones, profondamente konmovido por la Tierra de Leche i Miel. Los akontesimientoss i parabolas biblikas fueron siempre protagonistas en sus poemas i eskritos.

“
Sin Israel la historia seria distinta... Israel, no solo es una idea necesaria
para la civilizasion, es una idea indispensable. No podemos imaginar la
cultura sin Israel
”

De esta manera ekspresava Borges el fuerte sentimiento ke lo unia a Israel.
Esto se reflekta tambien en una entrevista realizada por el periodista Oved Sverdlik, ke le demando. “El tema djudio vuelve konstantemente a lo largo de toda su kreasion literaria. Kuala es la eksplikasion ke usted le da a este echo?” Borges respondio:

“Quizas eso provenga de haber descubierto, entre mis antepasados, nombres como Acevedo o Pinedo, que como usted seguramente no ignora, eran familias judeoespañolas que se encontraron entre los primeros habitantes de Buenos Aires. Pero incluso, aunque este hecho no existiera, yo quiero reiterar lo que ya dije en varias oportunidades: es imposible imaginarse la civilizacion occidental sin los judios y sin los griegos. Por eso, cada hombre de cultura tiene algo de estos i de aquellos. De esta forma puedo yo explicar mi deuda para con el pueblo judio, y de ahi mi preocupacion por Israel
cuando estallo la Guerra de los Seis Dias. Un poema que escribi en esos dias refleja tal angustia”.
En 1971, el Estado de Israel distingio a Borges kon el Premio Yerushalayim, el mas grande premio dado en el paiz, en el kampo de la literatura. En sus palavras kon esta okazion, Borges disho:

“
No hay en el mundo entero una ciudad que haya sido tan anhelada como Jerusalem... es una gran copa donde se han decantado y acumulado los sueños, las vigilias, las oraciones y las lagrimas de quienes no la vieron nunca pero sintieron hambre y sed de ella.” El mistisismo de la sivdad mas antigua del mundo era una de las mas profondas emosiones ke empushavan la kreasion de este gran eskritor. Su poema “Israel, 1969” transmete de mizmo, un profondo fervor sionista: “(..:)

La mas antigua de las naciones /es tambien la mas joven./No has tentado a los hombres con jardines,/ con el oro i tedio/ sino con el rigor, tierra ultima./ Israel les ha dicho sin palabras:/ olvidaras kien eres./ Olvidaras el otro que dejaste./ Olvidaras quien fuiste en la tierra/ ke te dieron tardes y sus mañanas/ y las que no daras tu nostalgia./ Olvidaras la lengua de tus padres y aprenderas la lengua del Paraiso./ Seras un israeli, seras un soldado./ Edificaras la patria con cienagas; la levantaras con desiertos. / Trabajara contigo tu hermano, cuya cara no has visto nunca. / Una cosa te prometemos: / tu puesto en la batalla.”

Es menester, entonses, de agradeser i azer omaje al gran eskritor argentino ke yevo a la literatura en espanyol, el manansial de la kultura djudia i su amor por el djoven Estado de Israel.
Por todos sus meritos, muy serkanos a la kultura djudia, konsideramos un djusto omaje a Jorge Luis Borges, el aver eskojido el aniversario del dia de su nasimiento komo Dia del Lektor en Argentina, .

Presidente del Centro de Investigación y Difusión de la Cultura Sefardí
Mario Eduardo Cohen

____________________________________________________